Zbulohet vendbanimi më i vjetër prej druri në Europë: Lin, Pogradec

LIN, POGRADEC – Nuk ka më asnjë dyshim: vendbanimi më i vjetër prej druri në kontinentin europian ndodhet në Lin të Pogradecit. Zbulimet më të fundit arkeologjike kanë konfirmuar se ky vendbanim ka qenë i banuar për një periudhë prej rreth 2000 vjetësh, nga vitet 6000 deri në 4000 para erës sonë.

Sipas arkeologut zviceran Albert Hafner, që drejton pjesën ndërkombëtare të projektit, ky është një nga zbulimet më domethënëse në historinë e arkeologjisë europiane. “Tashmë kemi prova të qarta që njerëzit kanë jetuar në këtë zonë për mijëra vjet, duke ndërtuar struktura banimi prej druri që ruhen ende sot nën ujë,” tha ai.

Ndërkohë, drejtuesi shqiptar i projektit, Adrian Anastasi, theksoi rëndësinë e metodave të reja shkencore të përdorura gjatë gërmimeve. “Këtë vit janë kryer tre sondazhe, një në tokë dhe dy nënujore. Janë zbuluar materiale të bollshme arkeologjike: qeramikë, vegla pune, kocka dhe gurë. Krahas kësaj, janë marrë kampione për analiza më të thelluara me teknika moderne si dendrokronologjia, me qëllim krijimin e një pamjeje të plotë të strukturave të banimit të asaj kohe,” u shpreh Anastasi.

Zbulimi ka tërhequr vëmendjen e institucioneve ndërkombëtare. Ambasadorja e Zvicrës në Shqipëri, znj. Ruth Huber, deklaroi se ky është një nga bashkëpunimet më të suksesshme ndërmjet ekspertëve shqiptarë dhe zviceranë. “Janë bërë shumë zbulime të rëndësishme për historinë e lashtë të liqenit të Ohrit. Jemi të kënaqur që shohim një bashkëpunim kaq të frytshëm ndërmjet ekipeve kërkimore,” theksoi ajo.

Faza e parë e këtij projekti pritet të përfundojë më 15 korrik, duke i hapur rrugë analizave shkencore të materialit të pasur prehistorik. Projekti është një bashkëpunim mes Institutit të Arkeologjisë dhe Universitetit të Bernës në Zvicër.