Nga Korça në Brazil, në gjurmët e një ëndrre për gazetarinë. Kjo është historia e Vefiola Zhakës, vajzës së poetit dhe artistit të njohur korçar Petrika Zhaka, i cili u nda herët nga jeta, duke lënë pas kujtimin e një krijuesi të veçantë.

Petrika Zhaka ishte një korçar që nuk e hoqi kitarën nga duart deri në fund të jetës. Krahas muzikës, ai krijonte edhe poezi, të cilat dalloheshin për trajtimin e tyre origjinal, ndryshe nga mënyra tradicionale e të shkruarit të poetëve të tjerë.

Vefiola e kujton të atin edhe përmes një periudhe të veçantë të jetës së tyre, kur së bashku frekuentonin Kishën Adventiste të Ditës së Shtatë në Korçë. Aty shërbente një pastor brazilian, i martuar me një korçare, ndërsa Vefiola, që në moshë të vogël, ndihmonte edhe në përkthimin e predikimeve.

Pikërisht këtu nisi lidhja e saj me gjuhën dhe kulturën braziliane. Që në moshën 13-vjeçare filloi të mësonte portugalisht, ndërsa njohjet me shumë brazilianë që frekuentonin kishën i zgjeruan edhe më shumë horizontet.

Pas ndarjes nga jeta të Petrika Zhakës, pastori dhe bashkëshortja e tij vendosën t’i gjendeshin pranë vajzës së mikut të tyre. Ata e morën Vefiolen me vete në Brazil, duke i dhënë mundësinë të ndiqte një rrugë të re drejt realizimit të ëndrrës së saj për të studiuar gazetari.

“Një arsye tjetër që më nxiti ishte fakti se disa miq të babait kishin studiuar në Brazil shumë vite më parë. Kjo më kishte ngjallur interes. Natyra ime, dëshira për të njohur botën dhe interesi për gjuhët e huaja më shtynë të ndërmerrja këtë hap. Për mua, ardhja në Brazil për të studiuar gazetari është diçka shumë e veçantë”, tregon Vefiola.

Sot, korçarja Vefiola Zhaka punon si redaktore dhe editore në Agjencinë e Komunikimit të Universitetit, ndërsa ndodhet në vitin e fundit të studimeve për gazetari. Ajo flet rrjedhshëm tri gjuhë të huaja, duke dëshmuar se pasioni për gjuhët dhe dëshira për dije kanë qenë pjesë e pandarë e rrugëtimit të saj.

Një histori që nis në Korçë, mes muzikës, poezisë dhe kujtimeve të një babai të veçantë, për të vazhduar mijëra kilometra larg, në Brazil, aty ku vajza e Petrika Zhakës po i jep jetë ëndrrës së saj.

Lajme Te Ndryshme